HIARIST

Der Hiarist zündt die Walder aon,

hiatz gluichtn s´ gölb und rot!

Der Wind sturmt über ´s  Föld davoun

und peitscht die jungi Soot.

Er reißt die Blattl va die Bam

und taonzt mit säi im Kroas.

Vorbei is iahna Summertram;     

säi mäissn mit af d´ Roas!

Die Sunn, däi bliangatzt letz und schwoch,

woaß nit vül Hitz mehr z´gebm.

Is eh scha d´ Fechsung ünter ´n Doch

und gsichert wieder ´s Lebm.

Es blitzt der Reif in oller Früah

va niadn Halmerl her.

Verbrenna tuit er d´ letztn Blüah - -  

bold trutzt ihm kuani mehr.

Der Nebl hüllt die Wölt ouft ein 

wia mit an bloachn Tuih.  

Und in der Stubm, ban Laompnschein,

findt ´s Togwerk gschwind sei´Ruih.

SCHNITTZEIT

Waonn ma ´s  Troad amul schneidt,

hörst d´  kuan Kucku mehr schrein.

Wia laong geht´s nouh her

und Hiarist wird´s sein.

Waht der Hiarbstwind bold wax

aus der Hofernholm her.

Dou schreckt dih kua Hitz,

kua Schauer nit mehr.

Glaonzt der Reif in dein Hoar,

geht dei´ Summer zan End.

Oft mirkst d´, wia dir ´s Lebm

verrinnt  zwischn d´ Händ...

Ah der Hiarist is schön,

nur verzogt därfst d´ nit sein!

Hörst ollwal in d i r

den Kucku nouh schrein.

Aus:  „Holm und Ähren"  Fürstenfeld 1980